عادة غريبة

السلام عليكم ورحمة الله وبركاته


1- ازيك يا بنى عامل ايه

2- الحمد لله يا عم كويس بس مضايق شويه

1- ليه بس مالك ؟؟

2- مش عااااااارف

———————————–

ده حوار بين اتنين الواضح من الكلام انهم ولدين

بس يؤسفنى جدااااااا انه حوار بين بنتين !!!!

الموضوع والحكايه ان انتشر جداا الايام دى

طريقه الحوار الغريبه بين البنات والالفاظ الرديئه جدا اللى مفروض كبنات مسلمات متعلمات

منقلهاش ولو حد عقب على كلام حد احم احم تبقى رجعيه ومش بتفهمى لغه العصر

بس سؤال هل ينفع ان بنت تتكلم بصيغه المذكر ؟؟ وايه الهدف من كده ؟؟


هل ده يعتبر تشبه بالرجال  ؟؟

عن ابن عباس رضي الله عنهما قال :

(( لعن رسول الله صلى الله عليه وسلم المتشبهين من الرجال بالنساء ، والمتشبهات من النساء بالرجال ))

اعتقد الحديث واضح جدا وصريح ولما لاقيت الحوار كده

استوقفنى الحديث

عموما سألت شيخ عن الموضوع ده

وقالى لا اجزم انه تشبه بس ممكن يدخل تحت بند الشبهات فنبعد عن الشبهات احسن

ويبقى اسلوبنا صحيح فى الكلام


تخيلوا مثلا ان الحوار ده كان بصيغه المؤنث بس بين ولدين اللى اعتقد مش بيحصل

لو حصل يبقى كارثه بجد

رد فعلكم يا بنات هيبقى ايه ؟؟

اكيد هتقولوا مالهم دول هو ايه اللى حصل فى الدنيا

ياريت اشوف رأى الشباب فى الموضوع ده لو سمعت بنت بتكلم بنت بصيغة المذكر

رد فعلك هيبقى ايه ؟؟

رأيكم هيفدينا اكيد ، فى انتظار اراءكم المفيده🙂


ياريت نفكر فى الكلام اللى بنقوله ومنكررش الغلط وياريت لو  حد بيعمل كده

وخد باله من الموضوع دلوقتى يسيب الاسلوب ده والموضوع ده  هيشهد علينا كلنا اننا عرفنا انه اسلوب غلط

اللهم بلغت اللهم فاشهد

This entry was posted in Uncategorized. Bookmark the permalink.

23 Responses to عادة غريبة

  1. Amel says:

    وعليكِ السلام ورحمة الله وبركاته

    تمام أنا ملاحظة الموضوع دا وخصوصاً في المنتديات
    وأحياناً الكلام ممكن يتفهم غلط وكأن البنت بتوجه الكلام لولد مثلاً
    لما تقول لبنت زيها
    حبيبي بدلاً من حبيبتي

    وحجات تانيه كـدا

    مش متخيله أبداً ولد بيقول لصاحبة
    إنتي متضايقه ليه يا قمر ؟
    :D:D دي تبقى مسخرة

    يمكن البنات دول كان نفسهم يبقوا ولاد أو كل إخواتهم ولاد الله أعلم

    • salma says:

      مين هنا أمـــــــل😀
      البلوج منور بجد

      عندك حق الموضوع ملحوظ فى منتديات كتير وشكل الكلام بيبقى مستفز جدا ، بس بقى منتشر برده فى الواقع مش على النت بس

      */
      مش متخيله أبداً ولد بيقول لصاحبة
      إنتي متضايقه ليه يا قمر ؟😀😀 دي تبقى مسخرة
      */

      بما اننا هنشوفها مسخره فاكيد هما كمان بيشوفوا البنات كده😦

      ربنا يهدينا جميعا
      وتسلمى يا قمر على مرروك اللى اسعدنى🙂

  2. angel says:

    السلام عليكم
    ازيك يا سلمى الاول
    ثانيا بقى😀
    طبعا دى وجهه نظر واكيد طبعا احترمها جدااا لكن ماسلمش بيها دا غير انى مش مقتنعه بالبوست كليا
    ياريت نفكر فى الكلام اللى بنقوله ومنكررش الغلط وياريت لو حد بيعمل كده
    وخد باله من الموضوع دلوقتى يسيب الاسلوب ده

    مين اللى أكد انه غلط انا مش عايزه افسر الحديث لانى مش عايزه اشيل ذنب حاجه مش متأكده منها لكن اللى سمعته من شيوخ عن تفسير الايه مكنش من ضمن التفسير الكلام البسيط اللى مزكور ف البوست
    انا مش شايفه ان موضوع البوست مشكله كبيره
    لو كان الموضوع ده بالعكس يعنى الولاد هما اللى بيتكلموا بصيغه البنات كانت دى المشكله الكبرى وطبعا الولاد استحاله استحاله يعملوا كدا
    لكن بالنسبه للبنات اوقات لما ينادوا ع بعض باسماء ولاد بتبقى من منطلق الحمايه اقل انواع الحمايه دى ان محدش يعرف اسمها ايه ولما واحده تقول مش عارف الدنيا ماولعتش برضه😀
    يعنى النهايه ان الموضوع ده مش مشكله لكن العكس اللى هايبقى مشكله وانا مقتنعه تماما ان استحاله العكس يحصل
    اذن مفيش مشكله اصلا😀

    • salma says:

      وعليكم السلام ورحمة الله

      اولا :- منوره يا مياده واسعدنى مرروك بجد

      ثانيا :- احترم رأيك جداا

      بس كلامك متناقض

      هل انا لما اكلم بنت بصيغه المذكر يبقى كده انا بحميها ؟؟!!! ازاى ؟؟

      فى فرق ان لما انادى على واحده مثلا باسم ولد تعرفه علشان تبص وده هيبقى لحظيا علشان محدش يعرفها وفى فرق كبير بين ان اكلمها ويدور حديث بيننا كانها ولد

      وكمان انتى شايفه انها هتبقى مشكله لو الولاد هما اللى عملوا كده ؟؟ والعكس مش هيبقى مشكله ازاى يعنى اكيد المنطبق عليهم هينطبق علينا برده

      انتى شايفه ان مفيش مشكله اصلا علشان اكتب البوست ده
      لو كان الرسول صلى الله عليه وسلم مقلش الحديث ده صدقينى مكنتش فتحت الموضوع بس المسأله خطيره وممكن نقع فى الشبهات بسببها

      ودى حاجه لفتت نظرى جدا واردت النصح ليس اكثر
      اتنمى تكون وجهه نطرى وصلت🙂

      • angel says:

        شكرااا طبعا ع وجهه نظرك
        بس
        اكيد طبعا اللى يضر البنات ما يضرش الولاد واكيد اكيد طبعا اللى ينطبق ع البنات مش شرط ينطبق ع الولاد دى حقيقه واضحه وكمثال ليها البوست ده
        الحديث الشريف كان من ضمن تفسيره ايه التشبه بالولاد كمثال لبس البنطلون وقصه الشعر والحاجات اللى تدخل ف نطاق الغلط
        لكن فيه حديث شريف او اى قرأنيه قالت ان حرام البنت فى قليل من كلامها تتكلم بصيغه المذكر

        انتى شايفه ان مفيش مشكله اصلا علشان اكتب البوست ده
        لو كان الرسول صلى الله عليه وسلم مقلش الحديث ده صدقينى مكنتش فتحت الموضوع بس المسأله خطيره وممكن نقع فى الشبهات بسببها

        وجهه نظر برضه احترمها بس من رأى انها مش من خطيره ولا حاجه
        طيب حاجه مهمه جدااااا
        فى القران الكريم ربنا فى أياته بيكلم المسلمين بصيغه المذكر وبتبقى الايات موجهه للرجال والنساء
        انا مابحبش أدخل ف التفسير بس ان البنت اوقات لما تتكلم بعبارات زى مش عارف وهكذا مش هاتكون زى الولد لما يتلكم ويقولك مش عارفه
        اكيد الفرق واضح واكيد اللى ينطبق ع الولاد عمره ماينطبق ع البنات
        وشكرااا لحسن استماعكم😀🙂

    • salma says:

      احترم رأيك تانى يا مياده😀

      وبرده اخنلف معاكى

      دلوقتى فى القرآن ربنا بيكلمنا بصيغه المذكر وده للعموم والشمول

      لان صيغه المذكر فى اللغه اعم واشمل من صيغه التأنيث

      سبحان الله كنت متأكده انك هتقولى كده 🙂

      ——

      بالنسبه للحديث بقى بالعقل والمنطق

      ايه اللى بيفرق البنت عن الولد

      طريقه اللبس والشكل زى ما قولتى وطريقه الكلام اكيد
      ده لما تكون بنت صوتها طخين شويتين الناس بتقول ساعتها صوتها زى الولد امال لو بتتكلم زى الولد يبقى ايه ظروفها ؟!!؟

      انا مش عارفه انتى عامله فرق بين الولد والبنت فى النقطه دى ليه
      هيا هياها صدقينى

      سؤال للولاد

      لو بنت اتكلمت مع بنت بصيغه المذكر هيبقى رد فعلك ايه ؟؟؟
      وهل ينفع ان ولد يتكلم مع ولد بصيغه المؤنث بتحصل معاكم ؟؟؟؟
      انتوا شايفين فى فرق بين الولد ان يتكلم بصيغة المؤنث وبين ان البنت تتكلم بصيغة المذكر
      ولا الاتنين وجهين لعمله واحده وهيا التشبه؟؟؟
      رأيكم هيفيدنا جدا فى انتظار أرائكم🙂

      • angel says:

        ازيك تالت يا سلمى😀
        لاء برضه اكيد الولد مابيختلفش عن البنت باللبس وشويه حاجات صغيرين الاختلاف اختلاف كلى وجزئى
        انا مش عارفه انتى عامله فرق بين الولد والبنت فى النقطه دى ليه
        هيا هياها صدقينى

        nop😀
        اظلاقا يعنى لازم اعمل فرق وجوهرى كمان البنت لما يتقال عليها دى بنت راجل بيتقال عليها كده عشان احترامها وادبها وحفاظها ع نفسها
        لكن الولد بما يتقال عليه بنت او يتكلم بصيغه المؤنث يبقى ايه بقى؟
        عشان كدا انا شايفه ان المشكله العكس لكن كون البنت بتتكلم اوقات قليله بصيغه المذكر مش مشكله كبيره
        بس دى وجهه نطرى😀
        لو بنت اتكلمت مع بنت بصيغه المذكر هيبقى رد فعلك ايه ؟؟؟
        حصلت قدامى كذا مره ومع اصحاب ليا وعادى معملتش للموضوع أهميه
        ممكن عشان انا من النوعيه اللى مابتحبش تكلكع الامور او تكبرها او بعلق ع حاجات
        دا مش معناه انه تصرف صح ف كل الاوقات بس صح فى معظم
        الاوقات
        وهل ينفع ان ولد يتكلم مع ولد بصيغه المؤنث بتحصل معاكم ؟؟؟؟
        انا ماشفتش حد كده ومااظنش ان فيه يقبلها ع نفسه
        حاسه انها حاجه مش موجوده اصلا
        وبس😀

      • la principessa says:

        @ miada😀

        اشمعنى الولد ميقبلش على نفسة يتكلم بصيغة بنت
        والبنت هيا اللى تقبل على نفسها تتكلم بصيغة ولد؟!!

      • salma says:

        اول ما شفت ردك التالت ده افتكرت مجدى زكريا ومحاضرته التحفه😆

        انتى قولتى البنت بيتقال عليها راجل فى احترامها وادبها واخلاقها
        معاكى كلام تمام جدااا

        بس مش بطريقه كلامهاااااااا تبقى راجل

        بصى احضرى معانا المحاضره الجايه وانتى تعرفى يعنى ايه راجل😀

  3. la principessa says:

    موضوع مهم وشائع جدا فعلا بس مكنتش اتوقع يوصل للدرجة دى😐
    وكلام سليم جدا جدا ولو سألت شيخ عن نفس المنطق حيقول نفس الحديث وان شاء الله نتأكد من الموضوع دا يا سلمى :D…

    • salma says:

      واصل يا بسمه واصل اوى
      هتأكدلكم من الموضوع ده ان شاء الله

      ومنورة يا بسمه🙂

  4. angel says:

    @basma
    الى الاخت المحبوبه بسمه😛
    اللى هاقوله هاعيده بقى ماانا قايله فوق يابت انتى

    البنت لما يتقال عليها دى بنت راجل بيتقال عليها كده عشان احترامها وادبها وحفاظها ع نفسها
    لكن الولد بما يتقال عليه بنت او يتكلم بصيغه المؤنث يبقى ايه بقى؟
    عشان كدا انا شايفه ان المشكله العكس لكن كون البنت بتتكلم اوقات قليله بصيغه المذكر مش مشكله كبيره

    وماتقفيش ع الوحده انتى كمان هى يعنى مشاكل الامه خلصت جت ع دى اشد فى شعرى يابت
    وبعدين ما فى بنات ما بتكلمش بصيغه المذكر بس بتقول كلام وحش اشمعنى سبتى دى بقى يابت انتى ووقفتى ع البنت اللى بتقول مش عارف وبص وبتاع
    وبعدين غير كل ده بقى حتى لو اتكلمت بصيغه المذكر مابتتكلمش بيها طول عمرها
    دا يادوب كلمتين وسكتت ع كده
    هاتمسكوا انتوا بقى الكلمتين اللى قالتهم دى وتقفوا عليها😀
    وف النهايه كلها وجهاات نظر تناقش
    والله ماانا عارفه احنا بنتناقش ف ايه من ساعتها😆

    • la principessa says:

      ما علينا :))
      احنا لو فضلنا نسيب الحجات اللى زى دى ونقول احنا بنقف عالواحدة وبنحبكها
      المجتمع حيولع ويبوظ اكتر مهو والع
      مهو البناطيل والقصات وكل حاجة جت من كلمة
      “سيبك انتى حتقفى عالواحدة ” وكلة من دا كتير بس الموضوع دا مستفذ بصراحة
      دا بتقولها “يبنى”!!!!!!!!!
      انا لو سمعت واحدة بتقول للتانية يبنى
      =))
      ساعتها حخاف اعد جنبها
      بجد انا عمالة اضحك
      الناس بتتقلب ولا اية بالظبط!!!
      انا حسكت اهو يا ميادة وتصبحى على خير ان شاء الله وبكرة اما نشوفك نكمل خناق باذن الله😛

  5. angel says:

    طيب انتوا مش عاجبكوا كلمه يابنى
    بتقولوا ليه حبى – يا جميل – يا باشا وما الى هنالك
    ماهى كل الكلمات دى صيغه مذكر ليه بتقولوا الكلمات دى ومش عاجبكم يابنى
    مع انها ع نفس الوتيره يعنى
    دا بقى اللى اسمه تناقض واخد اللى يعجبنى واسيب اللى مايعجبنيش
    صح يا بسمه🙂

    • salma says:

      جميل يا مياده وجهه نظر سليمه
      وفكرتينى بحاجه ان الرسول صلى الله عليه وسلم
      كان بيدلع السيده عائشه رضى الله عنها بعائش

      واعتقد ان ده زيها صفات مش حوار
      طيب يعنى كلمه حبى مثلا
      المذكر بتاعها حبيبى والمؤنث حبيبتى
      !! يعنى مش دى ولا دى

      بصى عموما انا فرحانه من نقاشك علشان خلانى اسأل شيخ

      واقولك قالى ايه بالحرف للامانه العلميه

      سلام عليكم
      وعليكم السلام

      دلوقتى يا شيخ لو فى حوار بين ينات بيتكلموا بصيغه المذكر ده يدخل فى التشبه بالرجال

      الشيخ سكت شويه بيفكر

      حضرتك مقدرش اجزم بالفعل انه تشبه بالرجال
      علشان الرسول كان بيقول لعائشه يا عائش

      تمام مع حضرتك بس ده دلع لاسمها مش حوار ولا كلام يلفت النظر
      طيب ممكن نحكم بالبيئه اللى موجوده حول الحوار
      يعنى مثلا بنات بترد على بعض فى منتدى بصيغه المذكر

      زى ايه حضرتك ؟؟

      زى مش عارف ويا عم ، طيب بص ، يا حبيبى ، ومتزقش

      كل الكلام ده بردود فى منتدى مثلا مختلط وولاد شايفين الردود دى وممكن رادين فى الموضوع ده

      لو مش على منتدى حوار بين بنات وولاد سامعينهم يبقى ايه ؟؟

      قالى بالحرف ممكن يدخل تحت التشبه بالرجال
      وده اسلوب مش كويس ولا صحيح للحوار ويلفت نظر

      جزاك الله خيرا
      وسلام عليكم

      انا شايفه ان الاحوط نبعد عن الكلام ده علشان منقعش فى الشبهات
      على الرغم الشيخ ما اجزمش انه تشبه بس ممكن يقع تحت بند الشبهات

      الموضوع انا نزلته لانه لفت نظرى جدا سواء على النت او فى الواقع فعلا
      وده فيه لفت نظر ومعتقدش انى غلطت لما لفت نظركم

      فتحت الموضوع وقولت وجهه نظرى اللى فهماها غلطت اه لما حطيت الحديث كانى باجزم انه تشبه وفتحت نقاش
      علشان فى الاخر نوصل لكلام معقول
      واعتقد كده وصلنا بعد الحوار الطويل ده اننا نحاول نبعد عن الحوار اللى بالشكل ده
      علشان مندخلش نفسنا فى شبهات

      شكرا لمرورك يا مياده🙂

    • la principessa says:

      غلط يا ميادة🙂
      هيا حُبى مذكر؟!!!!
      اول مرة اعرف ان حُبى مذكر😀
      وجميل وباشا دى مبقولهاش انا عموما لانى مش بحبها اصلا😛
      مش عارفة اية اللى معصبك😛

      • angel says:

        ههههههههههه طب بزمتك مين اللى متعصب دلوقتى
        وبعدين هو ده موضوع اصلا عشان اتعصب عليه😛

  6. angel says:

    @salma
    والله الراجل ده زى العسل😆
    تحسى كده انه من زمن الفن الجميل😆
    قوليلى محاضرته امتى وانا اجى ارزل عليكم (احتمال محتمل يعنى )😀
    وبالمره اجيب قرطاس اللب للبت هند😆

    • salma says:

      يوم الاتنين الساعه 12 ونص

      تعالى يا بنتى احضرى هتستفادى كتير😆

    • salma says:

      على فكره انا عدلت فى الموضوع علشان الشيخ ما اجزمش انه تشبه بس شبهات فاكيد مش هجزم انا
      اتمنى تكون فكرت الموضوع وصلت

      عــــــــادة غريبة 🙂

  7. angel says:

    جزاكى الله خيرا يا سلمى
    وفعلا اللى كنت مستغرباه ونافياه ف الموضوع انك بتأكدى ع حاجه انها حرام مع ان مفيش استندا لكده
    لكن جزيتى خيراا بجد ف سؤالك للشيخ
    وربنا يبعد عنا جمبعا اى شبهات
    وبالنسبه للمحاضره عندى محاضره ف نفس المعاد
    لو اتلغت ان شاء الله هاحضر معاكم😀
    وبرضه قرطاس اللب محفوظ:D

  8. My Fate says:

    طبعا مقدرتش أكمل كل الردود حاليا😀
    بالنسبة للموضوع ده
    أنا عن نفسي ساعات كتير باقول مش عارف
    وباقول كتير يا باشا
    الأولي هزار عشان وأنا صغيرة كنت باكلم بصيغة المذكر عشان اخواتي ومعظم اللى حواليا ولاد وكنت بأقلدهم كطبيعة أطفال
    فساعات بافتكر كده وأقول مش عارف
    وحكاية باشا برضه
    لكن أن الكلام ككل يقلب ولادي بقي ما أحبش كده خااااالص
    مش شايفة أن له لزوم يعني
    بعيدا عن حرام أو لأ
    ايه فايدتها اصلا؟؟؟؟؟
    وكمان لما الموضوع يقلب بناتي قوي
    بيستفزني جدااا
    تلاقي واحدة كل كلامها على المنتديات قااالب
    يا اختي كميلة
    ومش عارفة ايه
    مش شايفة أن ده ينفع برضه
    حاسة أن الحكاية غلط سواء الكلام يقلب ولادي أو يقلب بناتي بدلع زيادة بقي
    والأحسن نبعد عنه
    مش هنخسر كتير يعني
    شكرا على الموضوع يا سلمي
    جزاكي الله خيراا
    سلاااام

    • salma says:

      عندك حق يا سارة الاحسن والافضل لينا نبعد عن الاساليب دى
      ربنا يهدينا جميعا

      تسلمى يا سارة لمرورك اسعدنى بجد🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s