الثقة فى الأخرين

السلام عليكم ورحمة الله وبركاته

الثقــــــــــــــــة

كلمة كبيره ومينفعش نقولها لاى حد لان معناها كبير

لازم علشان اثق فى انسان لازم اكون عرفاه كويس جدا علشان اثق فى رأيه وفى نصايحه

وفى كلامه وانتقاداته ليا وفى امانته وفى كل حاجه عنه

صح ولا ايه ؟

ايه الحكايه وايه الالغاز دى !!؟

الحكايه ان تقريبا من 3 او 4 شهور او اكتر كمان

كنت ماشيه انا وهند واسماء واليوم ده مش هيتنسى كنا مجهدين جدا

ونفنسا نروح بعد مشى 3 ساعات

وفجأه وقفتنا واحده بنت فى سننا او اصغر بسنه هيا هندسه تقريبا

بس مش المنصوره جامعه خاصه

وسألتنا انتوا حاسبات طبعا علشان اللاب مش باين علينا اوى كده

فلما عرفت فرحت اوووى وقالتلنا انها كانت ماشيه تدعى ربنا تشوف حد من حاسبات

وكانت هتنزل الجامعه

وتدور على حد من هندسه او حاسبات وسألناها ايه الحكايه

حكتلنا قصه حياتها كلها وهيا منين وعاوزه ايه كل حاجه حاكتها بس انا مش فاكره😀

واحنا طبعا مستغربين جدا فى ايييه كل ده كلام وحكتلنا مأستها فى الكمبيوتر

وكلمناها كتير ونصحناها تبدأ ازاى

ومن مشكله لمشكله ويا قلب لا تحزن لدرجه انا كلمتها بنشفان شويه

قولتها كفايه مشاكل ركزى على الحلول بقى اكييد بعد الكلام مبطلتش برده

ووقفت معانا ساعه كامله وعلامات التعجب فوق راسنا وفى الاخر طلبت برجاء ارقام موبايلتنا

ورغم انى مش بحب ادى حد رقمى غير لما اتعامل معاه واعرفه الا انى اضطريت

ومن يومها وهيا بترن عليا ورساااااايل كتيير جدااا

وطبعا البركه فى عروض فودافون المتخلفه 1000 رساله

ناس كتير بتستخدمها بغباء بجد

المهم مش هدخل فى موضوع تانى

البنت دى بتبعتلى رسايل كتير حاجات كتير بتقولهالى ده لو نامت

وعاوزه تصحى بعد ساعه تقولى اصحيها

طيب الفجر ماشى واتعودنا على كده بس ده ايه !!

وكمان لو وراها امتحان تقولى ادعيلى ماشى دى عادى وتحكيلى مزاكرتها مع الماده

واول ما تطلع من اللجنه تطمنى عليها وعملت ايه ولو فى مشكله تقولى وغيرت رقمها كذا مره

وتبعتلى الرقم الجديد طبعا

ده عادى انا مش مضايقه لانها صعبانه عليا اكيد ادام وصلت للدرجه دى فهيا اكيد وحيده

ومحتاجه تتكلم مع حد وانا طلعت الحد ده

المشكله فى ان ازااااى تثق فى واحده مشفتهاش غير مره ولا تعرف عنها حاجه

وياريتنى فاكره شكلها لو شوفتها مش هعرفها بس هيا اكيد هتعرفنى هيا قالت كده يومها هههههه

موقف تانى اكيد بيحصلكم انتوا كمان

لما تعد فى المسجد وتلاقى حد داخل يتوضأ او رايح مشوار ويسيب معاك كل ما يملك


موبايل شنطه وعادى كانه يعرفك من زمان

اول سؤال بسأله بعد ما تيجى تاخد حاجتها هو انتى فى سنه كام لو فى سنه اولى

بعرف اكيد معندهاش خبره وفاكره ان المسجد مفهوش حراميه وناس بتسرق ولو فى سنه رابعه

بتصدم ازاااى يعنى متعرفش الموضوع ده

وبقولها متديش حاجتك لاى حد بعد كده وببيقى علامات التعجب فوق راسها

كأن انا اللى غريبه وهيا اللى طبيبعيه وده شىء عادى

بس اللى انا اكتشفته فعلا ان فى ناس كتير طيبه فى الدنيا دى

وعلى نيتها اوى وشايفين الناس كلها زيهم بس ده مش صح

مفروض مثقش فى اى حد لازم يبقى فى توازن فى الوحش زى ما فى الكويس

علشان لو اتصدمت فى حد مكرهش نفسى والناس كلها

انتوا ايه رايكم فى الموضوع ده ؟

واعمل ايه مع البنت اللى حكيتلكم عنها ؟

هل مردش عليها علشان اعلمها متثقش فى اى حد بسرعه

ولا ارد عليها علشان ممكن تكون محتجالى ووحيده فعلا ؟؟

مش عارفه بصراحه اعمل ايه

مستنيه أراءكم

سلام عليكم

This entry was posted in Uncategorized. Bookmark the permalink.

26 Responses to الثقة فى الأخرين

  1. hend89 says:

    هههههههههههههههههههههههههههههههههههههههههه
    البنت دي كانت غريبة جدا اصلا
    والواحد بيقابله مواقف كتير عجيبة بس ده كان عجيب عجيب يعني
    والحمد لله ان انا مش فودافون😛
    استحملي بقى

    المشكلة ان البنات اللي بيسبوا حاجتهم في المسجد دول كمان لما بنكلمهم يقولولك بس انا مش بسيبها مع اي حد
    وانا سيبتها معاكوا عشان شكلكوا معرفش ماله
    طب ما كل اللي بيسرقوا دلوقتي بيبقى شكلهم مش حرامية ولا يبان عليهم

    في ناس فعلا علانيتها اوي وده مينفعش في زمانا ده خالص ومع اللي بيحصل الايام دي

    بالنسبة للبنت دي معلش خليكي معاها .. انا كل ما بفتكر شكلها وهي بتكلمنا يومها بتصعب عليا جدا
    وزي ما قالت ان هي بعيدة عن اهلها في الدراسة
    هي اه غلطانة
    بس ده ميمنعش انك تخليكي معاها
    وربنا ييسرلها

    • katkat89 says:

      هههههههههه ماشى يا هند
      على فكره بتسلم عليكى كتيييير جداا وعاوزه تشوفنا قريب يا ستى افرحى بقى😛

  2. Yasmin says:

    ههههههههههههههههههههه
    لاحول ولا قوه الا بالله شكل البنت دي معذباكي وخلتك تعملي موضوع مخصوص
    بس فعلا في ناس طيبين جدا جدا ومش بيفرقوا بين الكويس والوحش
    وبالنسبه للبنت فخليكي معاها وقوليلها انها ما تعطيش ثقتها لاي حد بسرعه كده يعني انصحيها بس ما تسيبهاش وربنا يعينك

    • katkat89 says:

      فكرك كده يا ياسمين😀

      ماشى يا ستى هسمع كلامك يا كبير وهخلينى معاها ومفيش مانع اعرفك بيها كمان ان شاء الله😀

      شكرا يا جميل على مرورك

  3. bosycat says:

    انا شايفه فعلا انك تفضلى مع البنت دى وانتى كده بتعملى خير
    خليكى جمبها وانصحيها ووجهيها للصح دايما
    بلاش تسيبيها احسن تدور على واحده تانيه والله اعلم هتكون شكلها ايه وهتوديها لفين

    • katkat89 says:

      عندك حق يا ياسو ممكن تقع مع واحده تانيه واخد ذنبها😦

      ربنا يعينى وييسر الامور

      تسلمى يا جميل على مرورك🙂

  4. Dina Shaldoum says:

    ههههههههههههههههههههههههههههه
    اسلام اسلام اسلام
    صدقينى صدقينى البنت ديه فسوه فى وسط المواقف اللى بتحصلى😀😉

    فكرتينى :looooool

    اااه
    بس انتى عارفه حكايه ان حد يسيبك معاكى حاجه على ما يتوضى … مم اعتقد لو حد عمل كدا مع حرامى واعطاه ثقه الحرامى ده هايحترم الثقه !! اعتقد ديه طبيعه بشريه😐
    ههههههههههههههه
    بس برده موقف البنت ده ولا حاجه جنب مواقفى يا شيخه الواحد بيحصله حاجات عجييييه !!!😀
    مما يجعل علامة التعجب لا تفارق حياته😀😀
    فى النهايه أشكرك على دخول الابتسامه قلبى !!
    سلام

    • katkat89 says:

      امشى يابت من هنا انتى ومواقفك الـ … بلاش احسن😛

      وبعدين مفروض مشفكيش فى اى مكان دلوقتى غير لما تخلصى اللنك اللى بعتهولك😛

      تسلمى لمرورك يا دودو🙂

      • hend89 says:

        هههههههههههههههه
        دينا لو سمحتى اقرأي اللي هي بعتتهولك بضمير
        عندك امتحان :p

  5. wild flower says:

    لا فعلا يا سلمى متسيبيش البنت دي وخليكي جنبها و حاولي دايما تنصحيها مدام هيه متمسكه بيكي اوي كده
    يمكن تبقى احسن على اديكي و تاخدي بسببها حسنات
    ((( لأن يهدي الله بك رجلاً واحداً خير لك من حمر النعم )))
    فعلا كتير الواحد بيبقى محتاج يتكلم او ياخد راي حد و مش بيلاقي و عارفه الاحساس ده كويس
    بس حاولي تعرفيها زي ما قالوا انها متثقش في اي حد كده الا اما تعرفه كويس عشان متتصدمش
    واضح انها معندهاش اي تجارب في الحياه
    وانتي احسن من غيرك اللي الله اعلم ممكن يعلمها ايه

    اما بالنسبه للمسجد ففعلا هيه ظاهره غريبه
    بس انا مبعرفش اتكلم ببقى نفسي اقولهم ميسيبوش الشنطه مع اي حد خااالص
    حتى لو اصحابهم الا لو متاكدين انهم هياخدوا بالهم منها و هيبقوا فايقين لها
    المشكله ان الناس مش بتتعلم بالساهل
    لازم تتقرص عشان تتعلم
    بس احنا علينا النصيحه وهما حرين

    • katkat89 says:

      عندك حق فعلا يا منار ان شاء الله ربنا يعينى واساعدها🙂

      شكرا يا جميل على مرورك🙂

  6. la principessa says:

    😀
    كلميها انتى وقوليلها بصراحة انها متثقش فى حد ومشمعنى انك ممكن تكونى كويسة يبقى كل الناس كدا والكلام اللى انتى عرفاه دا
    وقوليلها””بسمة بتقولك بلاش هبل””
    حتقولك بسمة مين قوليلها
    “”مش شغلك!””😀
    بس هديها بكلمتين بعدها دا اذا مكنش “”اغمن عليها””
    ===================
    اول سؤال بسأله بعد ما تيجى تاخد حاجتها هو انتى فى سنه كام لو فى سنه اولى//

    انا مش بسيبها تدينى حاجتها على فكرة واللى بتيجى تعملى كدا بقولها انتى مش خايفة اسرقك؟!!
    ومرة واحدة جاتلى انا وامانى وقولتلها نفس الكلمة وفضلت اقولها ان فى حرامية كتير ومتأمنش لحد
    قالتلنا ماشى وهيا مستغربة كأننا بنشتمها وبعدين شوية وادت حاجتها لواحدة تانية😐
    بس انا عارفة ان “”مفيـــــــــــــــــــش حد بيتعلم الا لما يجرّب”” وخلى الناس تجرب بقى….

    • katkat89 says:

      هههههههههه ماشى يا بسمه هعرفك عليها ان شاء الله مع ياسمين😀

      علشان يغمن عليها فعلا😛😛

      وعلى رأيك فعلا محدش بيتعلم غير لما يجرب ويتقرص جامد ربنا معانا جميعا

      وتسلمى لمرورك يا ضحكة😛😉

  7. la principessa says:

    //عمل كدا مع حرامى واعطاه ثقه الحرامى ده هايحترم الثقه !! اعتقد ديه طبيعه بشريه

    هههههههههههههههههههههه اسلام قولى لدينا””بسمة بتقولك بلاش استعباط!!””😛

    • katkat89 says:

      ههههههههههه بسمه قولى لدينا انى بقولها انك بتقوليلها بلاش استعباط

      واوعى تنسى انا بحذرك😛😛

  8. hager says:

    ههههههههههههههههههه
    مش دي البنت اللي كانت واقفه معاكم يوم ما جيتولي في الكورس
    انا مكنتش اعرف انها وصلت للدرجادي
    و بعدين متسأليش كتير انتي اي حد يشوفك يثق فيكي علي طول ده مش عيب الناس ده عيبك انتي😛😉

    و بعدين لو موضوع الرسايل مضايقك اووي ممكن تقوليلها اعتقد الصراحه مش هتضر خصوصا ان معرفتك بيها مش قويه اووي
    بس يعني
    سلام عليكم بقي🙂

    • katkat89 says:

      ايوووون هيا دى

      ربنا يخليكى يا هاجر على الاطراء ده من بعض ما عندكم :*

      الموضوع مش مضايقنى اوى لانى بفيدها بس اللى مجننى حتة الثقه دى !!

      ومقابلتش حد قبل كده بالطريقه دى وللاسف مش هعرف اقولها كده غير لما اخد عليها اكتر شويه

      يعنى لو قابلتها تانى ممكن ابقى اقولها بعدها ان شاء الله

      انا لازم اخليها تتعرف عليكى يا هاجر انتى كمان مش انتى فودافون برده هتنفعى اوى😛

      تسلمى يا جميل لمرورك🙂

  9. My Fate says:

    موضوع مهم جدااا فعلا
    وللأسف أنا باخد على الناس بسرعة وبأثق فيهم بسرعة برضه
    بأحس دائما أن الناس الوحشة بعيدة عني وعن الناس المحيطة بيا
    بس أكيد ده مش صح كلية
    ومينفعش نثق فى اى حد
    بأحس أن ده عيب فيا والمفروض مبقاش كده
    وبحاول ابطل بس الطبع بيغلبني مع ناس معينة بأرتاح لها فمش عارفة بقي
    وبصراحة البنت صعبت عليا قوي استحمليها وخلاص يا سلمي

    وحكاية الشنط وكده فى الجامع فعلا مينفعش الواحد يسيب حاجته مع أى حد
    انا اصلا لو سبت حاجتي مع حد مش هافتكر شكلها عشان اخدهم تاني😀
    موضوع مهم ولازم الواحد ياخد باله فعلا
    ومبروك الاجازة يا سلمي باشا🙂

    • katkat89 says:

      وانا كمان والله يا ساره صعبت عليا وكنت متردده بصراحه اكتب موضوع عنها

      بس لو مكنتش شفت ردودكم دى كنت ممكن ازهق فعلا ومردش عليها كلامكم شجعنى اكتر اساعدها

      وحاولى تبطلى انتى كمان العاده دى علشان متتصدميش بحد الدنيا مش كلها حلوه🙂

      والله يبارك فيكى يا ساره واستمتعى بقى وكل ما يقل استمتاعك اتفرجى على الصور المرعبه بتاعتنا معشر بنات سى اس😀

      وشكرا لمرورك يا جميل

      • My Fate says:

        ههههههههه
        لأ الصور مش مرعبة ولا حاجة😀
        انا باتفرج عليهم كتير فعلا
        صور حلوة
        وهتبقي ذكريات أحلي بإذن الله🙂
        كانت فكرتهم حلوة قوي

  10. katkat89 says:

    ههههههه طبعا صور حلوه علشان انا فيهم صح😛😛

    انا بقول مرعبه علشان اول ما تتشاف اول كلمه تتقال باين عليهم سى اس فعلا وكأنه مرض او وباء مشترك بينا وباين علينا كلنا😆

    تتكرر تانى كتير ان شاء الله🙂

  11. la principessa says:

    هههههههههه بسمه قولى لدينا انى بقولها انك بتقوليلها بلاش استعباط//
    هههههههههههههه دينا اسلام بتقولك انى بقولها تقولك انى بقولك انك بتستعبطى
    —————
    =)) اسلام
    قولى لهند انى بقولها انها احلى واحدة فى الصور عشان بتضحك زى اللى عمرها متصورت =))

    مش حنخلص فى يومنا دا!!

    • wild flower says:

      بمناسبة الصور انا عايزه الصور اللي مش عندي بقى مليش دعوه

      و الصوره اللي كنا مسكين ايدين بعض فيها مش لقياها خاااالص

      حد يتصرف بقى بدل ما اعيط هنا ومش هتلحقوا تجيبوا عوامات انقاذ

      انا حذرت بقى و عملت اللي عليا😛

    • hend89 says:

      ايه ده ايه اللي جاب سيرتي هنا

      طبعا طول عمري احلى واحدة يا بسمة
      دي حاجة معروفة من زمان :p :p

  12. Falcon says:

    سلام عليكم
    بالنسبة للبنت .. انا شايف ان حضرتك مكنتيش تقولي عليها الكلام دا ، ليه مفكرتيش انها وقعت فيكم انتم ؟
    ليه مفكرتيش هي بتعمل كدا ليه … الانسان اللي كدا دا انسان محروم من معاني كتير اوي زي الصداقه او الصحوبيه والحنان والاهتمام
    هو فيه حاجة اكتر من ان يكون فيه واحد حاسس ان في حد بيهتم بيه وبيتكلم معاه
    مفروض حضرتك تراعي مشاعرها ومتبينلهاش زهق في كلامك او معاملتك ليها لان دا اكيد هيجرحها
    يمكن مفيش مقابل مادي حضرتك حاسه بيه من وراها ،، لكن فيه ايه اكتر من اني احسس بني ادم بانسانيته وآدميته في وسط ظروف سلبت منه كل معاني الانسانيه
    محدش بيعمل كدا الا لما يكون فعلا معندوش حد يقدر يعمل معاه اللي هي بتعمله معاكوا دا

    ببساطه في ناس كتير من دول بس الاغلبيه بتكتم جواها وبتعيش حياتها زي ما تيجي والناتج اكتئاب وحياه كلها قلق وحزن ،، وناس تانيه بتحاول تخلق لنفسها محيط تعيش فيه عشان تحس بانسانيتها ..

    ياريت بجد حضرتك تستشعري الكلام دا

    ##########################

    النقطة التانيه .. الثقه العمياء
    انا فعلا من الناس الهبل اللي بيثقوا في اي شخص
    انا دخلت مسجد قبل كدا ومعايا اللاب ورايح اتوضي والمسجد انا عارف وسامع كتير انو بيتسرق منه حاجات … بس انا هعمل ايه يعني لقيت واحد ملتحي وماشي في المسجد بيقرأ قرآن قولتله معلشي ممكن حضرتك تاخد بالك من الشنطه دي ع ما اتوضي

    طبعا دا رداً علي التعليق دا
    “ماهم اللي بيسرقوا دلوقتي شكلهم حلوين” او زي ما مكتوب فوق

    طيب دلوقتي ماهو دلوقتي انعدام الثقه في كل البشر بيخلق مجتمع حساس جدا في المعاملات
    الموقف بتاع المسلمين لما كانوا رايحين يشتروا تجارة واصحابها مكنوش موجودين اخدوها وسابوا فلوس مع انهم كانوا ممكن ياخدوها ويمشوا !!!

    موقف تاني سمعته لأستاذ فاضل الله يرحمه ويتغمده برحمته
    هو امام وخطيب الله يرحمه وكان عنده محل ادوات قطع غيار سيارات .. واحد راح يشتري منه حاجة قاله ممكن تدخل تاخدها من جوا .. بعدين فيه سواق بره شاف الواد دا اخد فلوس من درج المحل
    مسكه وقال للاستاذ دا عالموقف ،، قاله سيبه يا جدع
    وقال للولد قولي يابني هيكفوك دول ولا محتاج كمان ؟
    بيقول يمكن محتاجهم ياكل ولا محتاجهم لامر مهم وضروري

    يعني الراجل اعطي كامل الثقه للشخص اللي جه يشتري منه
    ومع ذلك ماحترمش الثقه دي وسرقه
    ومع ذلك سامحه

    تتخيلوا الموقف دا ممكن يؤدي الي ايه ؟؟

    اولا : في وفاة الاستاذ كان فيه الاااااااااف بيزفوه لقبره
    ثانيا : كان اغلبيتهم شباب
    ثالثا : مفيش شاب اتعامل معاه الا واحبه

    اعتقد اننا محتاجين نتعلم دا ونتعامل بالشكل دا
    طبعا مبقولش نخلي الموضوع عالبحري .. لازم يكون فيه قيود للمساحات اللي نقدر نسيبها للاشخاص التانيين في اخذ راحتهم المبنيه عالثقه دي

    ###################
    اتفرجوا علي خواطر 5في اليابان لاستاذ أحمد الشقيري

    شكراً وأسف للاطاله .

    • salma says:

      والله يا بشمهندس انا مش قصدى اجرحها ابدا وهيا طيبه جدااااا جدااااا
      واتمنى فعلا ان اقدر اساعدها ولو بالدعاء ويارب تكون وقعت مع واحده تستحقها وتقدر تفيدها
      انا عاوزه اعلمها حته الثقه دى لانى بجد حبيتها ومش عاوزاها تتأذى وتعرض نفسها ان اى حد يجرحها او يستغلها
      بس المشكله ان مش عارفه اجيبهلها ازاى لانها ممكن تفهمها غلط او تتجرح
      فانا قررت مش هقولها غير لما اخد عليها او اشوفها
      تانى وتالت ربنا ييسر ان شاء الله

      وغرضى من الموضوع ده وكلامى عليها كمثال (مش اهانه ليها والله) ان فعلا مينفعش نثق فاى حد مهما كانت ظروفنا
      مش عاوزه اعقد الامور او اقولكم ان الدنيا كلها وحشه بس ده الواقع اللى محدش بيقدر يهرب منه
      ليه نعرض نفسنا ان حد يجرحنا او يستغل اى حاجه لصالحه وانا معرفش عنه حاجه
      مهما كان الشكل العام والمظهر سواء واحده منتقبه او واحد ملتحى
      لااااااازم التعامل مش من اول مقابله اثق فى حد ممكن مش اهل للثقه دى
      ويمكن كلامى ده يبين فعلا ان اتـأذيت كتير بسبب الموضوع ده واتصدمت فى ناس كتييير قبل كده وقابلت اشكال وانواع
      والواحد مش بيتعلم بالساهل ولما بيتعلم مش بيبقى عاوز حد يقع فى الموقف ده لانه صعب اوى
      اصعب من الاكتئاب اللى ممكن يتعرضله لو مكلمش حد

      وحته عدم الثقه بيولد مجتمع حساس
      لا مش قصدى توصل لكده معنى كلامى اننا ناخد الحذر وناخد احتياطتنا ونتوكل على ربنا بعدها
      انا عندى ناس بثق فيهم كتير بس كل واحد وليه قدره برده فى الثقه

      والله يرحم استاذ حضرتك
      معتقدش ان حد زيه دلوقتى فى الزمن ده

      وشكرا لرأى ومرور حضرتك 🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s