الحب فى الله

السلام عليكم  ورحمة الله وبركاته

عارفه  انها  متأخره  سامحونى

كل عام  وانتم جميعا بخير وعيد سعيد عليكم وعلى الامة الاسلامية

وربنا يتقبل منا جميعا رمضان ويعيده علينا اعواما عديده ان شاء الله🙂

عاوزه  اكلمكم سريعا على اعظم حب فى الدنيا وابقى حب فى الدنيا وجدته

هو الحب فى الله

انك تحب شخص مش لانك هتسفيد منه بحاجه مش علشان مصلحه وخلاص لما تاخدها تنساه

الحاجات الكتيييره دى اللى بنشوفها الايام دى اللى قل فيها ان حد يحبك باخلاص ولله

مش عاوز منك حاجه

فى ناس اول ما بتشفها بترتاح ليها على طول وناس لما تتكلم معاها ويحصل موقف بينكم تحبها

وفى ناس تكون حاكم عليها غلط واول ما تتكلم وتتعامل معاهم تتغير فكرتك وتحبهم جدا

وفى ناس برده اتعرفت على اسمائهم بس ومتعرفش عنهم حاجه غير قليل على النت وتحبهم فى الله

رمضان السنه اللى فاتت اتعرفت على ناس كتير فى المسجد وحبيتهم جدا فى الله

وكان بينا اتصالات خلال السنه

واول ما رمضان جه السنه دى دورنا على بعض تانى واتقابلنا المحبه فى الله حاجه جميله اوى

اللى هيحسها اللى حب حد قبل كده فى الله طبعا الولد يحب ولد والبنت تحب بنت 🙂

قال رسول الله صلى الله عليه وسلم

( سبعة يظلهم الله في ظله يوم لا ظل إلا ظله …… ورجلان تحابا في الله اجتمعا عليه وتفرقا عليه ……. )  رواه البخاري

ومسلم

(إذا أحب أحدكم أخاه في الله فليعلمه ، فإنه أبقى في الألفة ، وأثبت في المودة )  (حسن ) صحيح الجامع

ياريت كلنا ندور على الحب ده  ومنضيعش ثوابه علشان نبقى فى ظل الرحمن

فى موقف غريب  حصلى فى رمضان بعد التراويح قعدت جنبى بنت وكل شوية تبصلى وانا ابصلها عادى يعنى

المهم كانت قاعده معانا واحده كمان عارفاها من السنة اللى فاتت والبنت اللى جنبى بتكلمها بتتعرف عليها وكده

وانا مش مركزه معاها اوى وبعد كتير لما لاقيتنا بنكلم بعض وعارفين بعض من زمان

سألتنى انتى اسمك ايه

واتعرفنا وطلعت هيا كمان خريجه السنه دى بس تربية علم نفس  واحنا بنتسحر مع بعض

الكلام وصل انها طلعت بنت عم امانى😀

قولتلها ايه ده هو انتى ايمان رولا اللى على منتدى نور الهدى قالتلى وانتى  كات كات !!

وسلمنا على بعض بقى والناس قعدت تضحك علينا قاعدين مع بعض من العشا وبنسلم على بعض الفجر

مع  بعض اكتر من سنه على النت واتقابلنا فى طاعه سبحان الله

وخرجنا منها باالمحبه فى الله

😀

كفاية عليكم كده

وربنا يرزقنا حبه وحب من يحبه وحب عملا يقربنا الى حبه

سلام عليكم

Posted in Uncategorized | 3 Comments

تم بحمد الله :)

السلام عليكم ورحمة الله وبركاته

بقالى كتيير مكتبتش

وفرحانه  ان البوست ده  عزيز عليا اوى

اتأخرت شويه فى كتابته نظرا لظروف خاصة ربنا يصلح احوالنا جميعا

الحمد لله اتخرجت اخيرا بعد اربع سنين بهدله فى الكلية

بس حقيقى كل يوم كان بيمر عليا  كنت بستفيد منه من مواقف ومواضيع وتعاملات وو..الخ

الحمد لله اتخرجت بتقدير عام  جيد جدا ومشروع امتياز

وخرجت من الكلية باحسن صحاب قابلتهم فى حياتى من اخلاق وعلم وكله الحمد لله

من ايام الامتحاانات وقولت احتمال كبير محضرش حفله التخرج الله اعلم هبقى فين ساعتها

بس كنت زعلانه على الاقل مش هفرح بنجاحى وتعبى مع صحابى

فعوضنى ربنا واهلى قرروا انهم يعملوا لى حفله فى البيت اعزم فيها شلتى😀

بس على شرط منهم انى مقلش عن جيد جدا

والحمد لله نفذت الوعد  واول ما شافوا النتيجه لاقيت التخطيط بدأ للحفلة تحت اشراف مورا😀

يوم الاحد 25 \7\2010

الساعه الخامسة

كانت حفله تخرجنا

ربنا يخليكم ليا يا احلى صحاب ونفضل فاكرين بعض بالخير دايما

احتفظوا بالبلونات اللى عليها اساميكم علشان تفتكرونى بيها:D

انا محتفظه ببتاعتى واللى فيها نفسى اعرف😀

اتمنى تكون الحفلة عجبتكم وتسامحونى على اى حاجه انا زعلتكم فيها

وان شاء الله نتقابل تانى فى افراحكم وكل ما نتقابل اعرف انجازتكم

ربنا يوفقكم فى حياتكم😀

سلام عليكم

Posted in Uncategorized | 7 Comments

نور قلبى

السلام عليكم ورحمة الله


البوست ده جه فى وقت مش ليا مزاج اصلا اعمل حاجه

وطبعا المايكرو هيا السبب  عاااااا مش على اسمها خااالص

دى لوحدها


6XL


لنا الله


المهم وانا قاعده مركزة اوى وشوية وخلاص هطق

الموبايل رن مش وقته لاقيتها مورا قولت يبقى وقته ونص😀

فتحت لاقيتها نووووور قلبى


ازيك يا اسلااامة

وحشتينى ،، انتى بتحبينى ؟

دى اول القصيدة😀

طبعا نطيت من مكانى من كتر الفرحة

وبتسألنى بتعملى ايه؟

بقولها بزاكر يا نور

تقولى علشان الكلية

اه يا نور كليتى اسمها ايه

حاسبات ومعلومات وقالتها بطريقه ماشاء الله زى العسل

وقالتلى رسالة اوصلها هقولهالكم فى اخر البوست😀

طبعا مكالمة زى دى فى وقت زى ده تخلينى اسيب المايكرو وافتكر نور قلبى

واللى بتعمله معايا مخصوص دون عن كل الناس

بتقلدنى فى كل حاااجة وبتحفظ كل حاجة اعملها وكل ماحد يعمل اى حركة انا بعملها

تقولهم زى اسلامة :^_^:

يا بنتى هو مفيش غير اسلامة فى الدنيا هيا عملتلك اييييه

😀

ناس حقوده

بيقولولها عاوزه تدخلى كلية ايه يا نور

تقولهم بمنتهى الثقة

حاسبات ومعلومات زى اسلامة

كان نفسى اقولها انهارده بلاش يا نور حاسبات شيليها من دماغك😦

بكره تعرف ان شاء الله  وتدعى عليا😀

افتكرت موقفين من احسن المواقف اللى بتعملها معايا ما شاء الله

مرة كنت جاية من الكلية وهموت وانام وهيا مصممة منمش واسيبها قولتلها

بصى يا نور صحينى لما الاذان يقول الله اكبر كان قبل المغرب بشوية

قالتلى ماشى وفرحت اووى قولت الحمد لله يارب هناااام

بعد خمس دقايق لاقيت اللى واقفه فوق راسى وتقول الله اكبر

هههههههه كأنه الاذان طبعا منمتش بسبببها لغاية الفجر

ومرة تانية وهيا اصغر شوية

قولتلها هنام يا نور شوية قالتلى ماشى

نمت كل ما اتقلب وافتح عينى الاقيها واقفه جنبى

افتكر انها جاية تشوفنى وهتمشى

طلعت فى الاخر يا عينى واقفة ساعة جنبى لغاية ما اصحى من النوم😀

ما بتعملهاش مع مامتها😀

ربنا يحفظها ويبارك فيها يااااارب وتفضل تحبنى طول العمر

كده كفاية عليكم فضفضة

اه الرسالة اللى قالتلى اوصلها

سلميلى على هند وهاجر وبسمة

😀

زاكروا كويس بقى

سلاااام

Posted in Uncategorized | 12 Comments

أخيــــرا

السلام عليكم ورحمة الله


—————


الحمد لله اخيرا عرفت اتغلب وانتصر على نفسى الضعيفة
بقالى شهر مش بشرب اى مياه غازية ولا باكل اى انواع شيبسى😀

طبعا ده كان قرار غصب عنى كان لازم اعمله
بس مرتاحه جداااا  جداااا دلوقتى  الحمد لله ،،
ده كان ادمان بالنسبه لى واكيد بالنسبه لمعظم الناس
والله يا جماعه الحاجات دى ضاره اوى وللاسف كلنا عارفين بس هو ادمان فعلا


عقبــــــــــــــالكم


سلام عليكم

Posted in Uncategorized | 12 Comments

كيتــــــــــى

السلام عليكم ورحمة الله


البوست ده كنت هكتبه من فترة بس مكنتش فاضيه ايامها

بس اول ما بسمه بعتتلى صور كيتى تخيلت الحوار ده😀


كيتى : بسمــــــة استنى

بسمة : ادخلى يا كيتى مش هتأخر


كيتى : يا بسمة ارجوكى متسيبنيش لوحدى بخاف 😦

بسمة : يا باااى  ادخلى يللا لازم ازعق فرجتى علينا الناس :-@


كيتى  : طب اهو امشى مش عاوزاكى

بسمة : ماااشى لما اجيلك


كيتى : دى مشيت بجد !! هيا ليه بقت كده ايه الرخامه دى ؟


كيتى : سلمى وحشتنى اوى نفسى اروحلها واسيب الرخمه دى يا ترى هيا عامله ايه


طق طق طق

كيتى : ميييييين  ؟!؟

بسمة : انا جييييت يا كيتى وحشتينى

كيتى : انا عاوزه اروح لسلمى

😦


————


كان معكم حوار داخلى لكيتى

والصور تشهد

😀


Posted in Uncategorized | 14 Comments

عادة غريبة

السلام عليكم ورحمة الله وبركاته


1- ازيك يا بنى عامل ايه

2- الحمد لله يا عم كويس بس مضايق شويه

1- ليه بس مالك ؟؟

2- مش عااااااارف

———————————–

ده حوار بين اتنين الواضح من الكلام انهم ولدين

بس يؤسفنى جدااااااا انه حوار بين بنتين !!!!

الموضوع والحكايه ان انتشر جداا الايام دى

طريقه الحوار الغريبه بين البنات والالفاظ الرديئه جدا اللى مفروض كبنات مسلمات متعلمات

منقلهاش ولو حد عقب على كلام حد احم احم تبقى رجعيه ومش بتفهمى لغه العصر

بس سؤال هل ينفع ان بنت تتكلم بصيغه المذكر ؟؟ وايه الهدف من كده ؟؟


هل ده يعتبر تشبه بالرجال  ؟؟

عن ابن عباس رضي الله عنهما قال :

(( لعن رسول الله صلى الله عليه وسلم المتشبهين من الرجال بالنساء ، والمتشبهات من النساء بالرجال ))

اعتقد الحديث واضح جدا وصريح ولما لاقيت الحوار كده

استوقفنى الحديث

عموما سألت شيخ عن الموضوع ده

وقالى لا اجزم انه تشبه بس ممكن يدخل تحت بند الشبهات فنبعد عن الشبهات احسن

ويبقى اسلوبنا صحيح فى الكلام


تخيلوا مثلا ان الحوار ده كان بصيغه المؤنث بس بين ولدين اللى اعتقد مش بيحصل

لو حصل يبقى كارثه بجد

رد فعلكم يا بنات هيبقى ايه ؟؟

اكيد هتقولوا مالهم دول هو ايه اللى حصل فى الدنيا

ياريت اشوف رأى الشباب فى الموضوع ده لو سمعت بنت بتكلم بنت بصيغة المذكر

رد فعلك هيبقى ايه ؟؟

رأيكم هيفدينا اكيد ، فى انتظار اراءكم المفيده🙂


ياريت نفكر فى الكلام اللى بنقوله ومنكررش الغلط وياريت لو  حد بيعمل كده

وخد باله من الموضوع دلوقتى يسيب الاسلوب ده والموضوع ده  هيشهد علينا كلنا اننا عرفنا انه اسلوب غلط

اللهم بلغت اللهم فاشهد

Posted in Uncategorized | 23 Comments

ارفع رأسك فوق

السلام عليكم ورحمة الله


زى العنوان ارفعوا راسكم فوووق


انتوا فى حاسبات واحمدوا ربنا على النعمه دى


مهما كانت سلبيات الكليه مش هتيجى حاجه


جنب اى كليه تانيه ومهما اضايقت من دكتور او معيد


فاللى عندنا احسن ناس بجد ونعمه كبيره كتير بيحسدونا عليها


قعدت انهارده مع شلة بنات فى بيطرى


يا ربنا على كميه الكره اللى بيكروه للكليه


والمهزله اللى بتحصلهم واسلوب الدكاتره وحكاياتهم


بجد صعبوا عليا جداا



وكلهم نفسهم يكملوا مجال تانى واغلبهم كمبيوتر


ربنا يعينهم ويصبرهم


فانا بدعوكم من موقعى هذا


ترفعوا راسكم لفووووق اوى وتحمدوا ربنا على كليتنا الجميله😀

Posted in Uncategorized | 4 Comments